في منظر في السما يريحك لمّا تقـع عينك عليه ..
في صديق يسندك علشان تعرف تكمل الطريق ..
في إبتسامة حد بتقدره وبتحبه أغنت عن الكثير والكثير من الكلام ..
في حكاية كل يوم ..
في بداية كل يوم ..
في إنك لسه قادر تلاقى الأمل جنبك أول ما تصحى بياخد بإيدك، يعينك ع اللى هتشوفه النهارده ..
في حلم تشوف فيه حد واحشك بعدت بينكم الأيام ..
في مج النيسكافيه .. في ريحة القهوة ..
في حاجة مسكـرة تجزع نفسك من حلاوتها، بالرغم من مرارة الزمن !
في إنك لسـه قادر في الحزن تفـرح ..
في ذكرى تمـر على بالك تفكرك أن "الأيام الوحشة عدت" ..
في كل مرة تخاف فيها من أوحش لسه ممكن ييجي، فتفتكر إن "لسه أجمـل يوم مجاشِ" ..
في حاجة ممشيتش على مزاجك.. وبعدين طلعت إنها أحلى حاجة كانت ممكن تحصلك ..
في حبة صبر حبة حمـاس .. بتدور عليهم جوه تفاصيل حياتك ..
لكـن لابد من يوم ييجي ويعدلها سيدك :)) ..
في حاجـة كنت خايف منهـا ومرعـوب .. وطلعت ولا حاجة ..
في حاجة كنت خايف منها ومرعوب وحصلت .. ومقتلتكش ولا حاجة ..
في شىء من الحكمة بيتضاف إليك مع كل يوم ..
في ضربة بتقوي .. وضربة بتعلّـم .. وقصة حيـاة بتكتتب وإنت البطـل بتاعـها ..
في يقيـن إن المؤلـف الأعظـم لقصة حيـاتك هو الحكيـم العليم ..
في الإحسـان .. أن تعبد الله كأنك تـراه، فإن لم تكـن تراه فإنـه يـراك ..
في الطمـع في المغفـرة، في الأمـل بالله ..
في نظـرة فلسفيـة عميـقة تكتشف فيـها إن مفيـش حـاجة تستـاهل ..
في مقـولة تجيـلك إنت بالذات علشـان تسمعهـا .. تقولك " شوفـت ربنـا ؟ "
في إن الحكـاية لسه مخلـصتش، والدنيـا لسه موقفتـش، ولسه فيـك نَفَـس..
في إننا لسـه عايشيـن !
30-10-2013
ليست هناك تعليقات:
إرسال تعليق