في عالم حلو موازي

ليه مصحاش من النوم في بيتي الحلو بتاعي لوحدي أصلي الفجر وأشرب حاجة حلوة وآكل حاجة حلوة وأسمع أغاني حلوة في البلكونة وآجي نازلة الشُغل الحلو بتاعي ألاقي هدية حلوة قدام الباب -مفيش داعي أقول هتبقى إيه- فأنشكح وأقرر آخد اليوم ده أجازة وأخرج مع الحد الحلو اللي جابلي الهدية.

وبجِملِة الأحلَام، ليه مأسقيش الورد الحلو بتاعي قبل ما أنام، وأمسي على السمك الأزرق في الحوض اللي جنب الدولاب، وآخد روايتي ويا أكتبها يا أقراها، وأعدي على أصحابي الحلوين نفر نفر برسالة "غدًا يوم أفضل" .. وأكتب ورقة صغيرة باللي اتعلمته النهاردة وأعلقها جنب أخواتها ع الحيطة جنب المكتبة، وأختم يومي بمُكالمة حلوة، تنسيني كل الوحش اللي فات، وأشوفني في المراية ابتسم، وأطفي النور، وأنام.

كان زماني اشتريت فستان أزرق قصير بنقط بيضا صغيرة، وعملت cupcakes بإيديا بطعم الفرحة والشيكولاتة، كان زماني في اسكندرية، بأتفرج على البيانولا، بأتمشى ع الكورنيش، حواليا ريحة الدرة المشوي وحمص الشام والحياة، ماشية بأغني ومحدش مركز معايا، وبنوتة صغيرة حلوة وقفت تديني بونبون، وبكل ما أوتيت من الفرحة بأكتب "استعينوا على قضاء حيواتكم بالأحلام".

#في_عالم_حلو_موازي
مبسألش نفسي صوت الكمان اللي سامعاه على طول ده جاي منين. ولا ازاي فجأة كل ما يوحشني حد بأقابله صدفة. ولا عن كل مرة كنت على وشك إني أزعل فألاقي فرحة كبيرة جت تخبط على بابي .. وبأفتحلها الباب على آخره .. ولا عن اني عملت ايه في حياتي القصيرة على الأرض يخليني أدخل الجنة.