هـو أنا فكرت كتير وكتبت أكتر ومسحت كل االلى كتبته علشان أرجع أكتب تاني ومعرفتش برضـه يعني فى الآخر أنا عايـزة أقول ايه؟
-الحيـاة كطـالب طب غريبة حقيقي .. علشان كده بأنسحب منها كتير في محاولة إقناع نفسـي إنى كائن طبيـعي ممكن يقضى يوم كـامل مش بيعمـل أي حاجة مُفيـدة (كلمة "مُفيدة" في قاموس طالب طب كلمـة تعني أى حاجة متعلقة بالدراسة وغير ذلك فهو يُعتـَد مضيعة للوقت) وممكن يرغـى ساعات في التليفـون أو يقعد نُص اليوم ع النـت ونُصه التاني متنـح في السقف مثلًا !
-بأفتـكر إن النهارده الجمـعة فأتصدم لأن الجمعة اللي فاتت كانت امبارح .. إزاي الوقت بيعدي كده طيب؟
-هو أنا كل اللي فاكراه إني كنت عايزة أقول حاجة بس مش فاكرة كانت إيه الحـاجة دى فقررت إنى هأجرب أكتب يمكن الحـاجة تتقال في نُص الكلام كده وأنا مش واخدة بالي.
-الطب حلو مفيش كلام .. الوحش هم طلاب طب نفسهم.
-البقـاء على قيد الحيـاة فى مصر إعجاز علمـي حقيقي ..
والبقـاء بكـامل قواك العقليـة في طب (في مصر) شىء مستحيل علميًا حقيقي حقيقي ..
لازم فيه حاجة فيك هتلسع كده :)) !
-كـل حاجة هتيجي في وقتـها بالظبط .. بالظبط بالظبط.
-من راقـب الناس مـات همًا .. يا ولدي :)) !
-حيـاتنا اتحولت بالتدريج من حياة طبيعية الناس بيتكلموا بصوتهم وبيشوفوا بعض ويتفاعلوا بجد وحقيقي إلى مجرد حياة إفتراضية كل حـاجة فيها بتحصل في صمت .. من غير صوت .. خنـاقات وخلافات وإتهامات رايحة جاية، كله دون أن تنبس ببنت شفه ! أصواتنا كلهـا جاية من دمـاغنا بس .. وكلامنـا كله حروف مكتوبة ياريتها حتى كانت مكتوبة على ورق .. دي مكتوبة على صفحات إلكترونية -إفتراضية- برضه.
-مش عارفة لسه فين المشكلة فى إنى أعيش حياة خاليـة من السياسـة والكـورة ؟
يعني على الأقل من حقي أختـار تفاصيل حياتي زى ما أنا عايزاهـا .. أملاها بكتب .. أملاها بمجلات ميـكي .. انـا حرة .. أو هكـذا أعتقـد .. !
-فكـرة الحيـاة في حد ذاتها مُغرية بالتجربة، يمكن لو كانوا سألونا قبل ما يولدونا عارفين كنا نقول ايه ؟ كنت ممكن أقول إنى هأحب أخوض تجربة زي دي يعني وماله ؟
بس هو انا لو كنت أعرف إن بقى هي الدنيا كده بقى هم الناس كده .. اكيد كنت هأغيّر رأيي.
-أنا يمكن مقابلتش ناس كتير في حياتي .. بس وسط الناس -القليليين- اللي قابلتهم كان فيه ناس بيتجسد فيهم معنى الحياة .. لا وكمـان معاني تانية كتير !
الناس دول كنت كُل ما أقرب منهم وأحس إنهم بشر عاديين زيينا كنت بأفضل إنى أبعد أحسن .. خليني أحـاول أشوفهم زى ما كنت شايفاههم فى الأول .. القُرب مش دايمـاً بيخلينا نشوف الأمور بأفضل صورة.
-على فكرة يعني الناس الشريرين في الدنيا هم سبب قيام الحياة أساسًا .. لولا الشيطان مكناش هننزل ع الأرض، ولولا صراعـنا إلى قيام الساعة مكانش هيكون فيه معنى لحياتنـا .. الحبكة الدرامية اللازمة في أى عمل درامـى بتعتمد على الشر مش الخير يا عزيزي.
-برضه بتفضل أى حاجة بتتنتمي لخبر "كـان" لهـا مكانـة خاصة.
-الفلسفـة حلوة .. التعقيـد في كل حاجة كده بيخلي الواحد يحس إنه ذكي وبيفكر وبيجيب #التايهة، هو عقـل الإنسان ده دايمًا كده بيودي فى داهية والإنسان أصلًا كائن غبي .
-نرجـع لمرجوعنا بتاع حياة طالب طب، هـو أنا عندي إعتقـاد إن أى حد قرر بإرادته كده إنه يدخـل كلية زي دي أكيد عنده ماسـوشية -وهي ببساطة، حب تلقي العذاب- كـافية إنه تخليه يُقبل على الطب، وبيبقي أقوي وأقدر على تحمل "الظروف العصيبة" دونًا عن بقية الناس العاديين .. !
-أحيانًا إنك تكـون بني آدم تافه هو قمـة المُتعة.
-البشر بصفة عـامة والقريبيين مني بصفة خاصة مبيقدروش يستحمـلوا يتعـاملوا مع شخصية زيي واحدة بتاخد كُـل حـاجة على أعصابهـا وعايزة كل حاجة تمشي صح او متمشيش خالـص .. ومبتحبش البني آدمين .. وشبه مُعقدة .. ومزاجـها بيتغيـر أسرع مِن ما بتغيير هدومها .. وناسية ثلاث أربـاع ذكريـاتها .. هم عندهم حق صراحة .. انا أصلًا ساعات مش بأستحمـلني .. بس خليني أقول إن لو مش هيقدروا يستحملـوني يبقوا ميقربوش أحسن، علشـان أنـا أسهل حـاجة بأعملهـا مؤخـراً إني بأخسر ناس آه وبالمنـاسبة أنا مش هأتغير يعني أنا عاجبـاني كده :'D -ومنين بييجي الرضا ؟ من الإيمااااان بالقضا :)) !
-محدش مرتـاح .. ومفيـش صاحـب يتصاحب .. وبطلـنا اللي يعطلنـا .. ومش هتيجي؟ مش هأروووح.
-مفيش أي حاجة مُفيدة -ليا ع الأقل- طلعت .. بس هنكتفـى بهذا القدر.
-يـارب .. رِضـاك والجنـة .. غير كده أصلًا مش مُهم.
1-11-2013
ليست هناك تعليقات:
إرسال تعليق