ممكن نعتبرها فضفضة ؟
أنا بحب الغنا .. بحب الجناين والبحر والورد واللون الأزرق .. بجب أقرا رواية وأعيش جواها ..بحب الأكل .. وخصوصاً لما يكون أكل بحبه .. بحب الصور اللى مكنتش عارفة فيها إنى بأتصور .. وبأكره كل صورة ملهاش أى لازمة غير مجرد التصوير .. بكره إبتسامة الكاميرا.
بحب أعرف إن الناس ليها حكايات وعوالم تانية معرفهاش بس بأكره أعيش حكايتهم هم وأنسى أكمـّل حكايتى .. مبعرفش أحب حد آه .. بس بعرف أحب صفات، بحب الجدعنة والشهامة .. بحب الكرم والجود .. بحب البساطة والصمت، والغموض و الوقار، والإلتزام والإحترام، التأدب وخفة الدم، الإحتشام.بحب حب ربنا وإن كنت مش عارفة أحبـه كما ينبغى .. بحب أسمع أكتر ما أتكلم بس يمكن من كتر السكوت نسيت الكلام.. او أدركت قد ايه الكلام ملوش أهمية أنه يتقال فأسكت أحسن، وأتقـّل ليه كتـابى بلسـانى؟
أنا بحب دور الكبار من وأنا صغيرة .. عمرى ما كنت صغيرة .. بس التطور أساس الإستمرار فى الحياة والناس كلها بتكبر .. إلا أنا .. عجزت من زمــان .. ! ورا كل فكرة فى دماغك مليون قبلها .. ورا كل كلمة فيه حكاية جواك .. أنت نفسك مش عارفها .. بحب النوم علشان فاصل فى حياة مجبورين عليها ممكن تعمل فيه اللى أنت عايزة وفى الآخر مهما غلطت قدامك دايماً فرصة تانية، لأن ده مجرد حلم !
*كيف يمكن للكتابة أن تخرج من عقلى أفكار لم أكن أدرك أنها موجودة بالداخل *
هل أنسى أم أتناسى؟بحب شوية روايح كده مش فاكرة منهم حاجة دلوقتى ..*هنكمـّل امتى علاج طيب؟* دكتور نفسى هو الحل فى رأيك ؟ الحل جواك أنتِ !قدرة ربنا مديهالك جواكِ أنتِ بس .. الإرادة ! بحب أعيش وسط ناس لكن يبقى عندى القدرة دايماً أكون لوحدى. مش دى الحياة اللى سيادتك عايزاها ؟ طب الأوردر نزل خلاص ..هتدفـعى .. ولو حتى مطلبتيش أصلاً .. هتآكلى .. قدرتك بقى بجد إنك تتطلعى شبعانة و مبسوطة !
- لمـّا تبقـى فى مكـان مضلـّم لفتـرة طويـلة وتخـرج للنـور أكيد عينيـك بتوجعك،
ولمـّا تبقـى مش شـايف الحقيقـة لفتـرة طويـلة وتشـوفها .. أكيـد قلبـك هيوجعـك.
-الواحـد بيحتـاج وقت كبير أوى علشـان يحس معنـى جملـة زى دى :
"إن حجـب الله عنك شيـئاً تحبـه، فـلا تحزن فـإن عطـاءه رحـمة، وحجبه حكمـة"
اللهم ارزقنا صبراً يصاحبه حسن ظن بك.
"رب خيرا لم تناله، كان شرا لو أتاك."
-من الرائـع ألا يستمـع الآخـرون إليك، فعنـدها يمكنـك قـول كـل ما تريـد قـوله مهمـا بلغ من الوقـاحة فلا أحـد يهتـم علـى كـل حـال.
-الواحد بقى بيظلم نفسه أكتر ما الدنيا بتظلمه.
-وكأنما أفاقت لتجد روحها قد حُبست بجسدٍ لا تعرفه، يُخاطبها أناسٌ طوال الوقت يبدون وكأنهم يعرفونها جيداً،من هؤلاء! هذة تعاتبها بأنها لم تتصل، وتلك تسألها عن أشياء تبدو للعامة أمور عادية لكنها لا تفقه منها شىء، أسئلة كـ "كيف حالك" أو "بما تشعرين الآن" ، إنها لم تعد تدرى حتى ما هو الشعور، وما معنى أن يشعر الواحدٌ منا بشىء فيترجمه إلى كلمات، هى تنتمى إلى كيانٍ آخر لم تعد تتذكر ماهيته، لكن الجميع يؤكد أنها هى هى.
-حبة ساعات .. ملهمش لازمة .. أو ليهم .. على حسب
لو حسبت كسبت ايه وخسرت ايه فى الكام يوم اللى عشتهم على الأرض احتمال كبير تطلع خسران ..
هو احنا ربنا خلقنا ليه ؟ ليه فيه شر على الأرض ؟ ليه قابيل قتل هابيل ؟ طب حس بإيه بعد ما قتله ؟ عاش حياته كلها بذنب عمله ... يعنى لحظة واحدة قرر فيها قرار خربت بقية حياته .. طب احنا ليه كتيير كده ؟ مش كان ممكن ربنا يخلقنا عدد صغيّر من الناس .. ليه كل الأعداد دى ؟ طب احنا من بداية الخليقة لحد دلوقتى أكتر ولا النمل مثلاً ؟ طب مين أهم ؟ العقل اللى بنتولد بيه ده فعلاً شغال ولا بيحتاج نعمل حاجة علشان نشغله ؟ الدنيا مالها حر كده ليه !
ايه مشاكلك فى الدنيا يعنى ؟ ايه اللى بيؤرقك فى حياتك ؟! طب الدنيا موقفتش ولا الأرض توقفت عن الدوران ولا القمر انشق ولا الشمس طلعت من المغرب ولا رفعت الأقلام وجفت الصحف .. يبقى أى مصيبة غير كده هينة !
كلام رومانسى حالم غير واقعى على الإطلاق ؟
مسيرك هتعرف ده بنفسك أنا مش محتاجة أقنعك بيه دلوقتى .. كلها أيام وكلنا نتأكد من الحقيقة دى بنفسنا ..
كم مرة تخيلت مشهد البعث؟ الحساب ؟ يوم القيامة ؟ متخيل أنك ممكن تدخل النار أصلاً ؟ لأ كده الكلام قلب على ترهيب بعض الشيوخ و"حراااااام" و"والله العظيم كلكوا هتنزلوا تحت" والجو ده .. ما علينا ؟
ما علينا .. هى ليه كل الناس بقت بتتكلم فى السياسة ؟ حتى أنا جبت سيرتها أهو .. ليه مش كلنا بنتكلم فى الدين .. بلاش دى علشان بقت عقدة عند الناس الله يسامحه اللى كان السبب .. ليه مش كل الناس بتتكلم فى القراءة مثلاً مع إنه موضوع خطير برضه .. طب يتكلموا فى الطبيخ .. فى الحب .. فى أى حاجة تانية .. ليه السياسة بالذات اللى الناس هنا كلهم بيتكلموا فيها .. بلا إستثناءات .. !
علشان حياتنا هى السياسة وإلى آخر النوع ده من الكلام .. ما علينا ؟
ما علينا .. موضوع التحرش بجد حاجة مقرفة أوى ! ازاى انحططنا لمنزلة الحيوانات للدرجة دى ؟
وعموماً البنات ليه دايماً بيتعاملوا على أنهم كائنات أقل .. مواطن درجة تانية .. ناقصات عقل ودين.
ما علينا .. ليه مواضيع الحياة فى العالم بتاعى قليلة أوى كده؟ ولا هى قليلة أوى كده أصلاً فى العالم بتاعكم كمان؟
التقليدية والروتين دول مش بيموتوكم ازاى ؟
أنا ممكن أكون أنا اللى تفكيرى غلط من الأساس ..
بس حقيقى مبقيتش فاهمة أى حاجة من اللى بتحصل فى العالم
أنا جيت هنا أعمل ايه ؟ وازاى ؟ طب وأنا موقفى ايه من الإجابات لما أعرفها ؟
مش عارفة
أكتر كلمة مزعجة فى التاريخ
وإقتباساً لجملة من "حسنى محمد"
"لسبب ما تمنحنا المعاناة نظرة فلسفية نحو الأمور ، نظرة نبرر بھا لأنفسنا سوء الأوضاع ببعض الفلسفة الملتوية ، و برغم ان ھذا نوع من خداع الذات، إلا أنه أفضل كثيرا من أن تمنحنا المعاناة أسباباً مقنعة للإنتحار".
-"الإفراط فى الأمل كالإفراط فى اليأس".
- ايه المميز فى انك تكون بتمتاز عن غيرك من البشر اللى بيمتازوا عنك لاننا كلنا مميزون!؟
ازاى تحس انك ممكن تعبر عن اللى جواك فى أمان الله من غير ما يطلعلك عشرين واحد فى نفس ذات اللحظة ليؤكدوا وبإستماته انهم يشاركونك نفس الأحاسيس ونفس المعاناة وبأنك لابد وأن تكون قد قرأت أفكارهم!؟
يعنى احنا مجرد نسخ مكررة تمشى على الأرض؟ وبالإستناد للمثل الشائع "يخلق من الشبه أربعبن"، احكيلى ممكن تحس بالتميز ازاى وانت فيه 39 بنى آدم شبهك شكلا؟ وآلاف شبهك مضمونا!
-وليه كل حاجة كان المفروض انها بتفرحك بقت بتزود حزنك ؟
-#عن كل مرة احتجت لنفسى فيها وملاقتنيش.
-#عن حقيقة إن مفيش أى حاجة ممكن تعوض مكان حاجة ناقصة.
-هنفضل طول عمرنا نسابق الزمن .. وفى الآخر هو برضه اللى هيسبقنا ..
أهم حاجة أننا فى وسط السباق ده .. لازم نعيش بجد.
-التغيير للأحسن مهم، لكن الثبات على التغيير أهم من التغيير نفسه.
-عارف حلها ايه؟ تقنع نفسك إن مهما حصل، الدنيا متهدتش يعنى! .. حتى لو اللى حصل ده هو إن الدنيا اتهدت فعلا.
-أصل السعادة دى برضه ليها ضريبة، أمال انت فاكر ان فيه حاجة ببلاش كده ولا ايه ؟
-كام واحد قالك هأفضل جنبك .. بصيت جنبك ملقيتهوش؟
-مش كتير شوية إن تلت عمرنا -على الأقل- بيضيع فى النوم ؟
-العقل .. هو النعمة اللى لو عندك عمرك ما هتاخد بالك منها، ولو مش عندك عمرك ما هتاخد بالك من غيابها.
-#عن الكتب والنسكافيه والشيكولاته والمزيكا ،والقلم والورقة ، وجدران غرفتى التى تحتوينى عندما يتحرك العالم بضع سنتيمترات إلى الوراء.
أنا محتاجة أعيش لحد ما أعرف كانت ايه الحكمة من إنى مموتش دلوقتى.وكان بيننا إتفاق ضمنى دون أن نتفق، بألا يبادر أحد منا بالسلام حين يرى الآخر.
وأغني لي فى فراشي لعلي أنام ..
ليست هناك تعليقات:
إرسال تعليق