ذات الحال .. نفسه

الازدواجية
هى انك تنوى تبدأ التغيير من بكره
ومتبقاش عايز تنام اليوم اللى قبليه علشان ميخلصش ..
عن أى تغيير تتحدثين؟

"الوقت الي هتقضيه في التفكير في الحاجات الي ناقصاك, المفروض تديه للتفكير في الحاجات الي عندك”
#عمر_طاهر

كتير بأتمنى لو إن افكارى واضحة
صريحة
محددة
ممكن اجمعها بكلمات فى جملة
أنا أفكاري عبارة عن كلمات بس
لما باحاول أنظمها معناها بيضيع
وبأعتمد بس
على إن اللي هيقراها بعدين
هيعرف يقرا ما بين السطور.

بقيت باخاف أنام
كان النوم هو الوقت المحبب بالنسبالى في اليوم كله
مكان أنا بس اللى فيه
بأفكارى وحياتى زى ما عقلى أنا بيرسمها
مهما كانت وحشة
فكرة انها مش حقيقية لوحدها كفيلة باسعادى
بقيت بأخاف أنام
لأنى مهما نمت
مسيري فى وقت
هأصحى.

هى الناس بتعمل معايا كده ليه؟

تخيل لو انك بتشوف فيلم
أول مرة
بس عارف كل احداثه
كلها
تشوفه ليه؟
تخيل لو انت عارف حياتك
كلها
هتعيشها ليه؟

ليه بقيت اكبر من عمرى بعشرات السنين
وفى نفس الوقت
بخبرة عمر اصغر منى بعشر سنين؟

قبل ما تدخل حياتى
كنت وحيدة
ساعات أكلم ناس كتير وملاقيش نفسى وسطهم
بأبقى عارفة انى مش منهم
وبأقدر نعمة الوحدة مادام فى البعد عنهم راحة
قبل ما اعرفك
كنا بنتكلم
كنت واحد منهم
وانا كنت وحيدة
بعد ما عرفتك
الوضع اختلف
حياتى اتملت بيك انت بس
فطبيعى جدا انك لما تغيب
الاقى نفسى كنت مبسوطة بمعرفتك
احس بالفرق
اتغير شوية
بعدين اكتشف
انى بقيت وحيدة أكتر.
جوايا أسئلة كتير أوى
خايفة الإجابات اللى بأهرب منها تكون الصح
انا مش عارفة نفسى بجد
أنا طلعت أوحش مما أنا كنت متصورة
فى الآخر هاتسأل لوحدى
وانا بس اللى هأجاوب
من غير أى عوامل مساعدة.

ساعات بيتهيألى انى من كتر الحزن مبقيتش بأحزن
يمكن بأدى مبرر لنفسى أنا ليه مبحسش؟
ويمكن عندى حق
ويمكن نحست
ويمكن حزينة فعلا ومش واخدة بالى
والف يمكن ويمكن..

بأحط راسى ع المخدة وقبل ما أنام
بأفكر
فى كل حاجة بأفكر
مفيش حل .. مفيش فايدة
اهرب للنوم
بأصحى الصبح وبعد ما افتح عينى
وقبل ما اشيل راسى من ع المخدة
بأفكر
فى كل حاجة اكتر بأفكر
بأندم لأنى صحيت ..
وبأهرب .. للصحيان
معدتش عارفة أنا عايشة فين
وأنا طول الوقت هربانة ؟

ليه كل افكارى سودا ؟
علشان كل احداث حياتى سودا ؟
طب ليه كل احداث حياتى سودا ؟
علشان طريقة تفكيرى سودا ؟
البيضة الأول ولا الكتكوت
مادام التغيير يبدأ من الداخل
يبقى. التفكير هو المشكلة
احنا نكسر البيضة أو ..
نقتل الكتكوت.

انا بأكره الأمل المعاق
لا أمل دون عمل ..

امتى كانت آخر مرة حسيت بجد؟
يابنتى الأموات مبيحسوش .. ولا حتى بالزمن.

ماعدت قريباً من أحد حتى نفسي .. ما أبعد نفسي عن نفسي.
نزار قباني

------------

نوتس صغيرة لقيتها متنطورة بالصُدفة، كتبتها من سنة بالظبط، أول ما تميت عشرين.
للتجميع والتوثيق مش أكتر.